Pagpapaanod

(Para kay Lola Belan)

Tila musikong umaaliw

Sa iyong pangungulila

Ang nililikhang tunog

Ng alon na humahalik

Sa natutulalang mga bato

Sa dalampasigan.

Umaasang ika'y maaliw

Habang pinagmamasdan

Ang paglisan ng iyong alaalang

Pinapaanod sa ilang na karagatan.

_

Mapapapikit ka

Sa buhanging pinasasayaw ng amihan.

Mawawala sa iyong pagtitig

Ang mga pinaanod

Ngunit nananatiling umaaliw

Sa iyong pandinig ang sayaw

Ng alon at batong

Tila naging pagpatak na

Ng bumabahang luha.

Abril 22-23, 2007