Guniguni ng Makatang Mapilit

Jornal Entri #1 (Panibagong Simula)

Maraming bagay ang nagbabago sa mundong ito. Katulad sa pagkakataong ito, hindi muna tutula ang nagmamakatang mapilit sa kadahilanang ipinangako niya sa kanyang sarili na gagawa ng jornal entri kada buwan simula sa pagpasok ng taong 2007. Ngayon na ang simula ng aking pangako. Ang katotohanan, plano ko na talaga na gumawa ng jornal noong nakaraang taon pa (Ang tema ko lang sa taong iyon ay tungkol sa pagsasaliksik ko sa Philippine Folklore). Sinimulan ko rin ito noong huling araw ng Enero 2006. Sa kasamaang palad, hindi ko ito naipagpatuloy dahil naging abala ako sa pag-aaral ng tula at sa paglikha ng mga kuwento na sa kalaunan ay hindi ko rin naman agad natatapos. Marami akong mga nais isulat sa bagong jornal na ito. Napansin ko kasi na hindi ko na natutugunan ang sarili sa kanyang nais na paglahad ng mga kritikal na bagay dahil nakakulong ako sa mga taludtod at talinghaga na bihira na lang sa panahong ito ang nakaiintindi o nakakaalam kaya nahihirapan akong idiin sa kanila ang mga iilan kong kaalaman sa pilosopiya, politika, kultura, kasaysayan, pag-ibig o kahit anong mga walang kuwentang ideya na kailangan ng malalim na eksplenasyon. Gagawin ko ito, isang tala kada buwan. Dasal ko lang na sana ay maipagpatuloy ko itong bagong simulang jornal hanggang sa mga susunod pang mga taon. Huwag sana na naman akong batiin ni Katamaran.

Jornal Entri para sa Enero 2007

Masamang Panaginip ang Pagkain ng Mais

Masamang panaginip ang pagkain ng mais,

Pangitaing taglagas sa butong napapagal--

Ang bawat butil ay luhang humahapis.

Masamang panaginip ang pagkain ng mais,

Animo'y pagtatagis sa katapusang saglit

Na pupukaw sa ating tulog na pagmamahal.

Masamang panaginip ang pagkain ng mais;

Pangitaing taglagas sa pusong napapagal.

Enero 29, 2007

Pusong Biskwet

Pakiusap,

Pagdamutan mo na ako.

Kahit ang patag ko'y

Tadtad ng butas.

Madali akong madurog.

At umaasa akong di makain

Ng langgam o ibon

Ang aking mga tira-tira.

Kaya pakiusap,

Angkinin mo na ako.

Mabilis naman akong malusaw

At malunok.

Enero 26, 2007

Bago Malito sa Pagrerebyu

Patong-patong na ang mga aklat

Dito sa isang munting k'warto.

Tila magkaka-alamat

Tungkol sa mga patong

Tanging ang hinangad

Lang ay matanto

At magagad

Ang k'wago.

Enero 24, 2007

Memento Mori de Espirito Santo

Nakatitig ang bungong may kandila

Sa ulo

Sa mg pilosopong banal

Na humihiling muling datnan

Ng pagiging santo.

"O! Espirito Santo,

Bigyan mo po ulit ngayon ng apoy

Ang tuktok ng diwa."

_

Unti-unting lumiwanag

Ang kandila sa bungo.

_

"At di po sana matulad

Sa mga martir at sa may-ari

Ng bungong ito, na puspos

Ang pagtanggap

Sa nakapapaso't kumukurap-kurap na liwanag."

Enero 22, 2007

Lady in White

Binati ako

Ng magandang binibining nakaputi

Habang nakaupo

Sa isang upuang

Nag-iisa sa kakaibang kuwarto.

Nagmamanhid ang aking katawan.

Hindi ko maintindihan,

Pero siya na yata ang pinaka-

Magandang babaeng nakita ko.

_

Isa ba siyang Houri?

Isa ba siyang Valkyrie?

O anghel na nagpapa-alalang

Nasa langit na ako?

_

Lumapit sa akin

Ang magandang binibini.

Nakasisilawa ang kaniyang ngiti.

Tumitimpla sa kaniyang puting suot.

Nakasisilaw rin ang hawak niyang

Pliers at injection sabay pakilalang

Isa raw siyang dentista.

_

Napadilat ako bigla

At napatitig sa silaw ng bintanang

Pinapatagos ang sinag ng umaga.

_

Panaginip!

               Panaginip!

Muntik nang may makarating sa langit.

Enero 20, 2007

__________________________________________________

Houri- In Islam, the ḥūr or ḥūrīyah (Arabic: حورية‎‎) are described as "pure beings" or "companions pure" of paradise.

Valkyrie- In Norse mythology the valkyries are dísir, minor female deities, who served Odin. The valkyries' purpose was to choose the most heroic of those who had died in battle and to carry them off to Valhalla where they became einherjar. This was necessary because Odin needed warriors to fight at his side at the preordained battle at the end of the world, Ragnarök.

Langit, Lupa

Ang lupa ay patungo sa ilalim

Ng lupa,

Pero ikaw ang Dagat,

Patungo sa kaitaasan--

sa langit.

Lagi ko itong napagmamasdan:

Ang kislap ng iyong mga kerubin at serapin

Habang nakapikit ang lupa.

Sumasalamin ito sa Iyong lawak

At lumilikha ng kristal na daan.

Daan kung saan malayang makatatawid

Ang aking kaluluwang

Nakakulong sa laman--

Sa lupa.

_

A! Totoong tanging kaluluwa lang

Ang mapag-isang manlalakbay

Ng dagat.

Habang ang laman ay nananatiling

Nakatayo sa dalampasigan

Kapiling ang mga pandama.

Mga pandamang nararanasan ang init, hapdi, sangsang, ingay at gaspang ng lupa

Habang unti-unting nagiging bula

At nag-aabang sa kanilang pakikiramay o pagpapaalam.

Ang paglalakbay sa Dagat

Ay patungo sa karagatan--

Sa langit

Na pupuno sa aking kaluluwa

Patungo sa eternal na buhay.

Enero 17, 2007

Bato ang Solusyon

1

Bato ang solusyon sa namimilipit na sikmura.

Kapag bumato ka ng bato,

Sanay batuhin ka ng tinapay.

2

Bato ang solusyon sa mga nagbabalat kayong kaaway.

Bumato ka sa langit,

Ang tamaan sana'y huwag magagalit.

3

Bato ang solusyon sa mga naulila't nalulumbay.

Gaano man kalayo ibato

Ang bato ay babalik din sa lupa.

4

Bato ang solusyon sa nagnanais makilala't sumikat.

Kaunting bato, kaunting simento,

Monumento.

5

Bato ang solusyon sa nagkasalang humihingi ng kapatawaran.

kung sinuman sa inyo ang walang kasalanan

Ang siyang unang bumato sa kaniya.

6

Bato ang solusyon sa naghahanap ng katapusan

Ang malaking tipak ng bato'y

Nawa'y bumagsak na sa mundo.

Enero 16, 2007

___________________________

Hango sa mga kasabihan, isang tula ni Pete Lacaba,

At berso sa Bibliya ang mga naka-italics

Sa Pinaka-mambabasa

Sa pagkakataong ito,

Binabasa mo ang isang tula

Tungkol sa isang nilalang

Na nagbabasa ng tula.

_

Sa pagkakataong ito,

Ang binabasa niyang tula

Ay tungkol sa isang taong

Nagbabasa ng tula....

Enero 15, 2007

Extra-Dios

Pagtapos mong lumagok,

Sa tingin ko ay wala ka pang planong

Tapusin ang araw na ito.

_

Pero Siya,

_

Pinag-iisipan na siguro sa iyo ang planong

Pagwawakas sa ilalim ng araw

At iyong ikalalagok pagkatapos.

Enero 13, 2007

Makulit at Paulit-ulit na Lasing (ako) Kagabi

Hindi ko namamalayang lasing na ako kagabi.

Lasing na ako kagabi.

Sa mga kuwento't tawanan niyo mas nalasing ako kagabi.

Mas nalasing ako kagabi.

_

Di ko namamalayang narating ko na ang impyerno habang lasing ako kagabi.

Habang lasing ako kagabi.

Mga demonyong pinagkukuwentuhan ako dahil lasing ako kagabi.

Dahil lasing ako kagabi.

Nakakairita ang kanilang tawanan kaya lasing ako kagabi.

Kaya lasing ako kagabi.

_

Pinutol ko ang piging sa Pandemonium kung saan lasing ako kagabi.

Kung saan lasing ako kagabi.

Bigla kong nakita kayong mga naghihingalo, buti na lang lasing ako kagabi.

Buti na lang lasing ako kagabi

Kaya naitaboy ko ang mga bayolenteng kampon ni Satanas, Salamat at lasing ako kagabi.

Salamat at... Patawad, lasing lang ako kagabi.

_

Patawad, lasing lang ako kagabi.

Enero 13, 2007

Mula sa Kakahuyan ng Luneta

Hindi ko alam

Kung nae-engkanto lang ako

Nang makita ko ang isang dalaga

Sa gitna ng kakahuyan.

Palundag-lundag pa ito

Habang hinahabol

Ang mga alitaptap

patungo sa isang malaking balete.

_

Tumaas ang aking balahibo.

Ang kaluluwa ko yata'y pilit kumakawala

Sa aking katawan

Para takasan ang nakikita

O habulin ang hindi na makikikita.

_

Walang patumpik-tumpik,

Nagpadala ako sa kaniyang anino.

At sa pagmamadaling masundan siya ay natisod

At nahulog ako sa bangin ng walang kamalayan.

_

Laking gulat na lang ng pagdilat

Ng nanliliit pang mga mata'y

Nasa isang siyudad na ako.

Siyudad na hitik sa kumikislap na liwanag.

Siyudad ng mga alitaptap.

Enero 12-13 2007

Salaming Bintana

Isang gabi, may kumakatok

Sa bintana ng aking kuwarto,

Habang kalmado ang hagulgol ng hangin

At iyak ng ulan ay biglang lumitaw sa kawalan

Ang mukha ng aking mahal-- nakapikit, nalulumbay.

_

'Matagal na kitang hinihintay,' bulong niya,

'Malamig ang gabi, umaga, tanghali, hapon--

Nagyeyelo dito sa aking mapag-isang kama

Na umaasa sa ating pagsasama sa lalong madaling panahon.'

_

Nagmadali akong tumayo at lumapit sa bintana.

Ngunit bigla siyang nawala sa aking

Nagki-kristal na paningin.

_

Ermitanyong paruparo, ang tanging kumakatok

Sa mahamog na bintana ng aking kuwarto.

Enero 10, 2007

Panata ng mga Deboto

Muling bumalik ang mga deboto

Ng Nazareno

Para linisin ang kanilang kasalanan.

At pagkatapos nilang hugasan

Ang kanilang mga kaluluwa,

Muling babalik ang iba sa kanilang

Madilim na buhay.

Muling babalik ang iba sa kanilang

Maitim na pamumuhay.

_

Iitim pa lalo ang Nazareno

Sa mga susunod pang taon.

Enero 9, 2007

Babala sa Tagtuyot

Kapag dumating ang oras

Na wala na tayong

Naiigib. Wala nang

Pag-ibig ang tubig.

Di na ako magtataka

Kung magmamakaawa ka

Sa pawis at luha mo.

Enero 8, 2007

Makulay at Maliwanag ang Gabi ng Nag-iibigan

Mahal,

Tignan mo ngayon tayo

Sa buwan.

Bilog na bilog. Kitang-kita

Ang hubog ng puting liwanag

Na kaniyang hinahasik sa anino

Ng ating daigdig.

_

Ay! aking mahal,

Mas tignan mo ngayon tayo sa paligid

Ng buwan.

Singsing na bahagharing

Sa kaniya ay yumayakap

habang patuloy nilang nilalandas

Ang madilim na ulap.

Enero 5, 2007

Ika-30 ng Disyembre 1896

Noong umagang iyon,

Nagulat ako

Sa maagang pagpasok

Ng bagong taon.

Dinig na dinig ko pa

Ang alingawngaw ng paputok

At sigawan ng mga tao

Mula sa pinagdarausan

Ng piging sa parke.

Ang balita ko pa,

May paradang gaganapin.

Ang mga guwardiya sibil, mga prayle,

Pati na ang mga mayaman at may katungkulan ay kasali.

Puwede raw manood ang mga katulad namin,

Basta huwag lang manggugulo.

Maghahain din kasi sila ng malaking handa

Na pagsasaluhan ng mga dumalo.

_

Isa talagang engradeng pagtitipon iyon!

_

Sayang nga lang,

Di ako pinayagan ni tatang

Na dumalo sa selebrasyong iyon.

Pero masaya pa rin ako

Dahil maaga ang bagong taon ngayon!

Maagang makahihiling ng suwerte at pag-asa.

Disyembre 30, 2006- Enero 4, 2007

Panibagong Pagtawid

10,

9,

8,

7,

6,

5,

4,

3,

2,

1,

Wala nang ibang narinig ang tenga,

Kung di ang umaatikabong ingay

Ng mga pinalad makatawid

Sa muling pagkakataong iyon.

_

Sabay nito, kinukulayan ang gabi sa pag-asang

Makakakita muli ng pag-asa,

Binubusog ang mesa sa grasyang

Alay para makatikim ulit ng grasya,

Pinupuno ang lahat ng ligaya at kagalakang

May darating pang mga susunod na galak.

_

At pagkatapos makapagbuntong-hininga sa sandaling iyon,

Isang panibagong pagsulong na naman ang haharapin

Sa kabila ng mga matang

Makapal na usok lang ang nakikita,

Mga paang

Kalat ng nakaraan ang tanging naaapakan

At kaluluwang

Mabububog pagkatapos mabasag

Ang katahimikan.

Disyembre 31, 2006- Enero 1, 2007

Agwa-bendeta

Pinatay ni San Miguel Arkanghel

Ang demonyo

Ayon sa tatak ng alak.

_

Ano ang nangyari pagkatapos?

_

Tinadtad nang pinong-pino

Ng  mabuting anghel

Ang demonyo.

Pinausukan sa usok

Ng apoy ng kasalanan

At piniga hanggang lumabas

Ang isang katas

Na napakalinaw, napakalinis.

Himalang lumitaw sa kaitiman

Ng nilalang ng impyerno

Itong tubig na kasing dalisay

Ng agwa bendita.

_

At ano pa ang nangyari pagkatapos?

_

Walang kaalam-alam,

Sa katas na ito muling isisilang

Ang nasirang nilalang.

Dito magsisimula kanyang

Paghihiganti.

Disyembre 29, 2006

Nabigla at Naaksidente

Nang sinabi mo sa iyong kasintahan

Na ika'y buntis,

Napalundag ito sa iyong balita

At nauntog sa kisame.

_

Sa sobrang sakit,

Kiniskis niya nang kiniskis

Ang dalawang nilalamig niyang palad.

Namuo dito ang init at ipinatong sa ulo.

Naginhawaan ng bahagya,

Bumukol pa rin.

_

Sabay muling inalala ang inyong nakaraan...

Di sinasadyang pareho lang ang nangyari.

Disyembre 26, 2006

Nang Bumilog ang Aking Tiyan sa Mundo

Naaaninag ang kislap

Ng hamon at keso de bola

Sa gintong Christmas ball

Na nakasabit sa ating

Christmas tree.

_

Berdeng-berde ang plastik na dahon nito.

_

Sumagi tuloy sa alaala

Ang nag-iisang pakwan

Na ating pinagsaluhan sa isang noche buena

Ilang taon na rin ang nakakaraan.

_

Tangi kong patunay na bilog ang mundo.

Disyembre 25, 2006

Bukas, Ang Araw ay Pasko

Nagkakasiyahan noon ang mundo

Nang pumayag tayong makita ang isa't isa.

_

Malamig ang panahon na iyon,

At naging dahilan para tayo'y magyakapan.

_

Alam natin na sa oras na ito'y may naghahanap na sa atin.

Mga taong laging nakatingala sa kapalaran ng langit.

_

Dito tayo nagkubli sa sabsabab

Kung saan inilabas natin ang pag-ibig na naghahari.

_

At kahit anong pagsilong sa makapal na dayami

Ay tumatagos sa mga siwang nito ang liwanag

Ng nakaturong mahiwagang estrelya.

Disyembre 24, 2006

Kaya Hindi na Bumalik si Santa Claus sa Pinas

Nakita ko si Santa Claus, nag-iisa,

Naka-upo't nalulungkot sa 'ming plaza.

_

"Ginoong Claus, anong lungkot ngayong pasko?"

_

"Nakita mo ba ang alaga kong usa?"

_

"Kinuha yata ng lasenggo sa kanto!"

Disyemnbre 21, 2006