Guniguni ng Makatang Mapilit

Itong Christmas Blues ni Scrooge

Itong papatay-sinding mga pamaskong ilaw,

Itong papatay-sinding mga pamaskong ilaw,

Parang naghihingalong bitwin sa kadiliman.

_

Itong ingay ng lata at tansan ng karoling,

Itong ingay ng lata at tansan ng karoling,

Ay mga alingawngaw ng yuping kahirapan.

_

Itong paulit-ulit na pagbigay regalo,

Itong paulit-ulit na pagbigay regalo,

Dala'y paulit -ulit na kaipokritahahan.

_

Itong amoy ng bagong lutong puto't bibingka,

Itong amoy ng bagong lutong puto't bibingka,

Kabaliktarang simoy sa loob ng simbahan.

_

Itong pagmamadali sa pagbili sa t'yangge,

Itong pagmamadali sa pagbili sa t'yangge,

Ay pagmamadali rin sa ngayong katapusan.

Disyembre 20, 2006

Walang 'Parole' ang Parol

Kung iniisip mo

Na ang parol na isinabit ko

Ay para tanglawan ka

pag-uwi mo,

Nagkakamali ka.

_

Dahil naghihintay ito sa 'yo

Para palayasin ka

Gamit ang kanyang kislap

At magiging shuriken

Para ibato ko sa 'yo.

Disyembre 19, 2006

Nagiging mas Berde ang Damo sa Gabi

Tuwing kasama kang tumingin sa langit

Na puno ng kislap, kindat, at pagkubli

Sa mga planetang may tangkang pag-akit,

Nagiging mas berde ang damo sa gabi.

_

Malalim, malamig, milya-milyang tanglaw

Itong kalawakang nililikha'y dumi

Na nagpapalusog sa lumibang araw.

Nagiging mas berde ang damo sa gabi.

_

Dito sa damuhan, habang gumugumon

Ang kislot ng puso at mga tutubi

Sa ating pagdungaw sa malaking balon,

Nagiging mas berde ang damo sa gabi.

_

Tuwing kasama kang tumingin sa langit,

Nagiging mas berde ang damo sa gabi.

Disyembre 17-18 2006

Simbang Gabi-bingka

Hindi ako bumangon

Sa mga 'gabing' ito

Para lang magkuyakoy

Habang may muta't hilong

_

Nakikinig sa sermong

Tungkol sa paghahanda't

Pagpuri taon-taon.

Muli akong hihiga

_

Sa 'king pinaka-kama

Matapos ko lang kanin

Ang gawa mong bibingka.

Ay! Nakahuhumaling.

Disyembre 16, 2006

Tumalon na lang Sila sa Tulay

Ay! Pulitiko,

Tumalon ka na lang sa malapit na tulay.

Lumubog, lumubog hanggang iyong masuyod...

Ikaw na hindi pa nakikita ang lalim ng ilog.

Tubigang puno ng pag-aalsang nagtitimpi

At natatabunan ng bulang sumasabay sa agos

Patungo sa bukanang tubig-alat ng tadhana.

_

Sa ilalim nito ay nakatira ng katotohanan:

Mga isdang laging gutom, kaya lagi mong nabibingwit.

Mga lumot na animo'y talahib at sagabal sa'yong panghuhuli.

Mga batong matalino sa dahilang hindi sila naaanod.

(Matalinong nagmamaang-maanga't manhid sa nangyayari.)

At mga basurang iyong itinapon mula sa 'yong bakuran.

_

Tiyak, kapg sinubukan mo ang pagsisid dito,

Maaaring matibo ka ng kawit ng ibang namimingwit,

O lumubog pa

                 Nang lumubog

                 Hanggang sa malunod.

(Hango sa isang kanta ng Earth, Fish, Fish)

Disyembre 15, 2006 

Hindi Totoong Walang Santa Claus

Si Santa Claus.

Nandiyan lang siya

Sa tabi,

Madalas nagpapanggap

Bilang isang estranghero.

Kumakabog ng barya

Sa mga batang pulubi

Hanggang makarating ito

Sa kanyang tiyan.

MInsan naman isa siyang

Matandang pilantropo,

Na umaapaw ang galak

Ang pamimigay

NG kaniyang mga biyaya

Sa mga pamilyang

Paghilik ang Noche Buena.

Pero minsan,

Nagbabalat kayo rin siya bilang

Isang tindero, tsuper, barbero, bumbero, pulis, sundalo, doktor, abogado, inhinyero, tambay sa kanto o kaya siya, ikaw, ako tayo...

_

Nakapanghihinayang lang

Dahil tuwing kapaskuhan lang siya

Madalas kung magpanggap.

Disyembre 14, 2006

Bago ang Criticism

Pinuna ng isang grupo ng nag-iinuman

Ang bandang tumutugtog:

_

Walang consistent sa notes.

Walang rhythm.

Malakas ang bass. Maingay.

Sabog ang snare at strumming.

Sablay ang lyrics.

Walang sense.

Sintonado ang vocalist.

Walang fashion statement.

Maruming tignan.

Mukhang bum na gutom.

Walang audience impact.

Radio unfriendly.

Di ito makabebenta ng record.

Walang pupunta sa concert nito.

Di dapat sila nag-band.

_

Tinanong ng isa sa waiter kung ano

Ang pangalan ng bandang tumutugtog.

_

Sila po raw ang

"Pinatay ni Pollock si Amorsolo band."

Hindi na nagsalita pa ang grupo.

Disyembre 12, 2006

Biglang Litaw sa Kawalan

Nagmukmok ako sa labas ng bahay

Isang gabi matapos kong

Masaksihan ang ika-isang milyong

karahasang nilunok ng aking

Pagkawalang-bahala.

Dinamayan ako ng demonyo.

Inakay at tinanong ang problema ko.

"Ano ba ang kailangan ng

Buhay na walang problema?"

Wika niya.

"Pagkain? Kayamanan? Kapangyarihan?"

Tumalikod ako sa kanya,

Sabay tingin sa pamilyang pulubing

Natutulog sa kanto ng daan.

"Bakit ko kailangang problemahin

Ang pagkain, kayamanan, kapangyarihan?"

Balik kong tanong.

"Para makumpleto ang iyong buhay."

Sagot niya.

"At bakit di kumpleto ang

Lalang ng Diyos na makapangyarihan?"

Ngumiti ang demonyo

At umiling sa akin.

"Ako man ay nagtataka rin."

Disyembre 11, 2006

Muling Pagsulyap sa Baywalk

Naghahalikang mag-s'yota.

Dinumog ng mga bata

Ang mamang sorbetero.

Nand'yan ang inggiterong

Araw't look ng 'nila.

Disyembre 10, 2006

Nagniniyebe Ngayon ang Aking Pasko

Nagniniyebe ngayon ang aking pasko

Sa kabila ng klimang di nagyeyelo.

Karamay itong luhang naging sereno

Sa gabing nababalot nitong sigabo.

_

Tuloy na malalagas ang mga lambo

Ng krismastring pinuno ng pagtatalo.

Nagniniyebe ngayon ang aking pasko

Sa kabila ng klimang di nagyeyelo.

_

Kahon-kahong paglisa't pagkakanulo

Ang inaabangan kong mga regalo,

Ngayong ikaw ay anghel sa munting kubo

Na kamatayan itong inaanuns'yo.

Nagniniyebe ngayon ang aking pasko.

Disyembre 10, 2006

Ang Langgam ay Nae-elepante

Wala pa akong nakitang patay

Na elepanteng nilalanggam.

(O di pa talaga ako nakakita ng patay na elepante.)

Pero ilang ulit na akong nakakita

NG masipag na langgam na

Mala-elepante ang gilas

At sa mala-elepante napatay.

(At nawalan ng silbi ang kaniyang

Pagpapanggap bilang elepante.)

Di man lang niya natamasa ang sarap ng buhay

Sa tuwing matatapakan

Itong isang naghihikahos na langgam.

Disyembre 9, 2006

Mamayang Pag-urong

Salamin

Ang tambak na

Kutsara,

Tinidor,

Baso,

Mangkok,

Pinggan,

Kaldero,

At kawali

Sa lababong nanlulunod.

Repleksiyon

Ni bunso,

Ate,

Kuya,

Tito,

Tita,

Lolo,

Lola,

Nanay,

At tatay

Na abala

Sa telebisyong nanlulunod.

Disyembre 7, 2006

Ako at si Nicole

Napapikit ako sa pag-abang sa susunod

Na katanungan.

Napaluha naman siya sa pag-abang

Sa hatol.

Sabay inilantad ng hurado ang aming

Inaabangan.

Napangiti ako dahil alam ko ang kasagutan.

Napayakap naman siya sa inasahang mangyayari.

Napatitig na lang ang kalaban sa di naulinigang

Mga pag-uusap.

At sabay kaming nahismasmasan sa galak.

Disyembre 4, 2006

Ang Piko at ang Pangarap ng mga Palaboy

Nadatnan ko itong mga batang palaboy

Isang umaga sa kanto ng isang

Kondo at parke.

Bagong gising. Nag-aalala

Para sa panibagong araw ng paghahanap

Ng ilalagay sa bituka at mamaya

Sa paglalagakan ng hapong katawan.

_

Pumulot ang isa ng tiles na iniluha

Ng pader ng gusali.

Gumuhit ng kuwadra-kuwadradong

Masasayang pagkakataon sa sementadong

Puso ng lungsod.

Pinaghati-hatian nila ang nakabubusog

Na kintab ng tiles na parang tinapay.

Sinimulan na nilang ibato ang ligaya

Sa mundo habang lumulundag

Sa mapait na katotohanang

Isang paa lang ang humahakbang sa kalupitan

Ng lupa.

Ilang ulit silang babalik at babalik

Sa pakikibakang ito,

Hanggang sa maiguhit na ang pangarap

Sa konkretong palad ng kinabukasan--

Bahay. Tahanan.

Disyembre 2, 2006

Gumaganda rin ang Lahat sa Gabi

Kung sa tuwing gabi na lang

Ay nagagalit ka kapag nagbabago

Ang iyong pangangatawan sa salamin,

Lumayo ka diyan at lumapit sa akin.

Gawin mo akong salamin.

Sasabihin ko sa iyo ang mga bagay

Na gustong-gusto mong marinig.

Tiyak na ngingiti ka sa pagbabago

Ng iyong pangangatawan sa bagong salamin.

Disyembre 2, 2006

Sa malalim na pagtitiis

At sa dulo ng mahirap

                     Na mahirap

                     Na mahirap

                     Na mahirap

                     Na mahirap

                     Na mahirap

                     Na mahirap

                     Na mahirap

                     Na paghihirap...

...

...

...

...

...

...

...

                                                                                                               ay sarap.

Nobyembre 30, 2006

Ako, sa Anghel ng Liwanag at sa Liwanag

Huwag kayong lumapit sa akin,

Mga Anghel na binihisan ng liwanag.

Kayo na ilang ulit na nilinlang

Ang diwa ng mga bulag

Na pakapa-kapa sa 'yong milagro at himala

At paminsan-minsang babala.

Kayo na nagtuturo kung saan ang daan

Patungo sa lugar na puro kaputian

At liwanag lang ang tanging nakikita.

Hindi napapansin ang sobrang nakasisilaw na lugar.

Ang nakahihilo sa mga matang pawang

Hanap ay iba't ibang kulay.

Ngunit dahan-dahang naglalaho ang aninag

Dahil sa katakot-takot na iluminasyon.

Kayo rin ang dahilan

Kung bakit di ko na makita ang mundo

Kung saan ako nagsimula.

Dahil sa oras na hinipo niyo ang napipintong oras

Ng aking bulong sa katawang ito,

Hindi ko na alam kung liwanag ba ito

Ng pangakong walang-hanggang kaligayahan

O liwanag na itinapon sa kadiliman

Dahil sa kakaiba nitong liwanag.

_

Hayaan niyo na lang ako dito.

Sasamahan ko na lang si Jack sa kanyang

Pagkatok sa bawat puso habang

Bitbit ang kapirasong liwanag na nakangiti.

Nobyembre 30, 2006

Pagkatapos Marinig ang Alulong ng Aso

Nanggigigil sa pagsipol ang takure.

Patay-sindi sa kusina ang bombilya.

Mga dagang sa kaldero nagpip'yesta.

Matataba't gintong budhang nakangiti.

_

Mga aklat na nagkalat sa la mesa.

Kapitbahay na patuloy ang pagtili.

Telebisyong dahan-dahang namumuti.

Wala pa ring kumukurap, humihinga....

Nobyembre 29, 2006

Asin at Sampalok

A! asin,

Mineral na isinilang

Sa dagat.

Ikaw nga'y kristal

Na huwad

Ang pagkutitap.

Katulad

Ng luhang hirap...

_

At ikaw prutas,

Sampalok.

Halata sa balat

Ang manhid

Ng mga puso

Mong matitigas.

_

Miserable ang buhay

Nating maalat ang kapalaran

At maasim ang pagkatao.

Masarap naman ang pagsasama.

Nobyembre 25, 2006